Nin horay u dilay nin iyo Naagtiisii oo galabta lagu qisaasay Magaalada Marka.

Muqdisho: ( Sh.M.Network) Maxakamada Xarakada Mujaahidiinta Al Shabaab ee gobolka Sh/hoose ayaa galabta Magaalada Marka waxaa ay xukun qisaas ku fulisay nin la sheegay in uu horay u dilay nin iyo naagtiisii.

Xukunkaani qisaasta ah ayaa galabta waxaa lagu fuliyay Aadan Yaroow Biyeey (Aadan Killi) oo da’diisu ay tahay 51 sano jir kaasi oo la sheegay in uu dil bareer ah u geystay 31-kii bishii labaad sanadka 1431-kii Taariiqda jihriga C/raxmaan Cabdi Shacbaan iyo Xaaskiisa Faadumo Cabdi Cusmaan.

Ninkaani la Qisaasay ayaa waxaa la sheegay in labadaani qof ee is qabta uu ku dilay Tuulada Garmaay oo iyadu hoostagta degmada kuntuwaareey ee gobolka Sh/hoose, waxaana goobta uu ka dhacay xukunkaani qisaasta ah ku sugnaa dadweyne aad u farabadan.

Qaadiga Maxkamada degmada Marka Sheekh C/raxmaan Kismaayo oo goobtaasi ka hadlay islamarkaana xukunka qisaasta ku dhawaaqay ayaa sheegay in qoysaskii ay ka dhasheen dadkii la dilay iyo kuwa dhalay ninka dilka geystay ay isku afgarteen in xukunkaasi qisaasta ah la fuliyo.

Gudoomiyaha Xarakada Mujaahidiinta Al Shabaab ee gobolka Sh/hoose Sheekh Max’ed Abuu Cabdala ayaa sheegay in ciidamad sirdoonka ee Maamulka Islaamiga gobolka Sh/hoose ay in mudo ah ku daba jireen gacan ku dhiiglahaani maanta la qisaasay isagoo intaasi ku daray in ugu dambeyn isbuucii la soo dhaafay gacanta ay ku soo dhigeen.

Xukunkaani ayaa kii ka horeeyay ee ka dhaca Magaalada Marka waxaa lagu fuliyay askari ka tirsanaa Ciidamada Xarakada Mujaahidiinta AL Shabaab oo isagu fal dil ah u geystay qof reer gobolka Sh/hoose ahaa.

Aqriso oo la soco Shabelle.net Saacad Walba si aad u hesho wararkii ugu dambeeyay ee Soomaaliya.