Nairobi: (Sh. M. Network) Wasiirka dowladda Ingiriiska u qaabilsan Arimaha Afrika oo Maanta wareysi qaas ah siiyay Shabelle ayaa ka hadlay arimo dhowr ah oo ay ka mid yihiin dhibaatooyinka taagan Soomaaliya, Somaliland, Puntland,  Lamaanaha Ingiriiska iyo Qaraxyadii ka dhacay Kampala.

Wasiirka Cusub ee Dowladda Ingiriiska u qaabilsan Arimaha Afrika Henry Bellingham oo maanta waraysi gaar ah siinayay Shabakadda Warbaahinta Shabelle ayaa wuxuu sheegay inay waajib tahay in dhibaatooyinka Soomaaliya ka taagan loo helo xal siyaasadeed,

Wasiirka oo Wariyaheena  Axmed Nuur Max’ed Faarax Gantleman uu wareysi kula yeeshay Magaalada Nairobi ayaa intaasi ku daray inay u caddeeyeen dowladda KMG ee Soomaaliya in ay ka doonayaan inay horumariso shaqadeeda iyo wax u qabashada Shacabka Soomaaliyeed.

Sidoo kale wuxuu sheegay in ay la shaqaynayaan maamulada Somaliland iyo Puntland si ay horumiyaan taageeradooda shacabiyadeed.

“Ma aha oo kaliya dowladda KMG waxa aan la shaqaynayno laakiin sidoo kale waxaan la shaqaynaynaa mamaulka cusub ee Somaliland, maamulka Puntland iyo maamulada kale ee ka jira gobolladda Soomaaliya, waxaan soo dhawaynaynaa fikrad kasta oo wax dhisaysaa, si loo helo dib u heshiisiin buuxda” ayuu yiri Henry Bellingham oo u waramayay Shabelle

Wasiirka oo ka hadlayay ciidamada dheeraadka ah ee midawga Afrika uu doonayo in la geeyo Soomaaliya waxa uu sheegay inay ciidamadaasi ay xoojin doonaan ciidamada AMISOM ee Muqdisho ku sugan isaga oo intaasi ku daray inuu aaminsanyahay in ciidamada dowladda iyo AMISOM ay si wanaagsan u wada shaqayn doonaan xilligaan, isla markaana ay dhamaystiri doonaan shaqada loogu talo galay.

Sidoo kale waxa uu sheegay Wasiirki in wakiilka gaarka ah ee Qaramada Midoobay ee arimaha Soomaaliya uu dawr muhiim ah ka cayaari doono xal loo helo dhibaatada Soomaaliya.

Dhanka kale Bellingham oo ka hadlayay qaraxii dhawaan ka dhacay magaalada Kampala ayaa aad u cambaareeyay Al-Shabaab isaga oo sheegay inay waxyeelo u gaysanayaan shacabka Soomaaliyeed isla markaana ay ka hor istaageen gargaarka bini’aadanimo dadka ku nool koofurta iyo bartamaha Soomaaliya.

“Waxaan ku dadaalaynaa in aan kula talino wadamada deriska ah inay xoojiyaan la dagaalankooda argagaxisada, waxaan sidoo kale ku dadaalaynaa in xagjirka kasta oo dalka Ingiriiska ku nool kaasi oo ku fikiriya inuu Soomaaliya yimaado in aan ka hortagno, innaga oo ka dhaadhicayna Bulshada Soomaaliyeed ee ku dhaqan boqortooyada Ingiriiska inay ka hortagaan barnaamijada argagaxisada si aan loo dhibaatayn Soomaalida.” Ayuu yiri xili uu u jawaabayay Wariye Gentleman

Wasiirka ayaa sidoo kale mar uu ka hadlayay lamaanaha Ingiriiska ee lagu haysto dalka Soomaaliya waxa uu ugu baaqay kooxaha haysta in aysan waxyeelo u gaysan lamaanayaashaas isla markaana si shuruud la’aan oo degdeg ah ku sii dayaan. Waxa uu sheegay inaysan is badalin siyaasada Ingiriiska isla markaana aysan wax madax furasho ah siin doonin kooxaha haysta lamaaanayaasha ingiriiska.

Wasiirka ayaa booqashadiisa Kenya uu ku yimid waxa uu diirada ku saarayay inta badan arimaha Soomaaliya isaga oo sheegay in dowladda Ingiriiska ay kordhinayso taageerada ay u fidiso shacabka Soomaaliyeed.

Cabdikariin Maxamed Jimcaale

Shabakada Warbaahinta Shabelle

Nairobi, Kenya

Aqriso oo la soco Shabelle.net Saacad Walba si aad u hesho wararkii ugu dambeeyay ee Soomaaliya.

NALA SOO XARIIR This e-mail address is being protected from spambots. You need JavaScript enabled to view it